இலங்கையின் உள்ளூராட்சி சபைத் தேர்தல் அண்மையில் நடைபெற்று, அந்தந்த பிரதேசங்களைச் சேர்ந்தவர்கள் வெற்றிபெற்று, ஆட்சி அமைத்து உள்ளனர். இவர்கள் தேசிய நிலை பிரச்சனைகளைத் தீர்க்க முடியாது என்பது உண்மைதான், ஏனெனில் அவர்களிடம் அந்த அதிகாரம் இல்லை. இருப்பினும், தங்கள் அதிகார வரம்பிற்குள் மக்கள் வாழ்வை மேம்படுத்த பல நடவடிக்கைகளை எடுக்க முடியும்.
தோன்றும் ஒரு முக்கிய சிக்கல் என்னவெனில், அதிகாரம் கிடைத்தவுடன் சிலர் செயலில் இறங்குவதற்கு பதிலாக, பேச்சுகளிலும், குற்றச்சாட்டுகளிலும் வீணாக நேரத்தைச் செலவிடுகிறார்கள். தங்கள் அதிகாரத்தை தாண்டிய விடயங்களைப் பற்றி வாதிடுகிறார்கள். இது மக்களிடம் எதிர்மறையான எண்ணங்களை உருவாக்குகிறது.
உள்ளூர் பிரச்சனைகள் – எளிய தீர்வுகள்
- தெருவோர குப்பைகள்
சில பிரதேசங்களில் தெருவோரம் குப்பைகள் கொட்டப்பட்டு சுற்றுச்சூழல் மாசடைகிறது. இது சுகாதார சிக்கல்களையும் தோற்றக் குறைகளையும் ஏற்படுத்துகிறது. சுற்றுலா பயணிகளை முகம் சுழிக்க வைக்கிறது. வீடு வீடாக சென்று குப்பை சேகரிப்பு சேவை ஏற்பாடு செய்தால், இந்த சிக்கலை குறைக்கலாம். அதோடு, குப்பைகளை பிரித்தெடுத்து, சேகரிப்பது போன்ற திட்டங்களை அறிமுகப்படுத்தலாம். - போக்குவரத்துக்கு இடையூறும் மரக்கிளைகள்
உள் வீதிகளில் மரங்கள் மற்றும் செடிகளின் கிளைகள் வீதிக்குள் வந்துவிடுவதால் வாகனங்களுக்கு இடையூறாக உள்ளது. நடந்து பயணம் செய்வதற்கு இடமே இருக்காது. இதற்கு தீர்வாக, மாதாந்த பராமரிப்பு பணிகளைத் திட்டமிட்டு, கிளைகள் வெட்டப்படும் வகையில் உள்ளூராட்சி ஊழியர்களை நியமிக்கலாம். - குப்பை எடுக்கும் முறையின் குறைபாடுகள்
ஒழுங்கற்ற குப்பை சேகரிப்பு சேவை மக்கள் மனதில் அரசாங்கத்தையே விமர்சிக்க வைத்திருக்கிறது. தொழில்நுட்ப உதவியுடன், வீடுகள் எப்போது குப்பை கொடுக்கவேண்டும், எப்போது சேகரிக்கப்படும் என்பதை மொபைல் செயலி அல்லது அறிவிப்பு பத்திரங்களால் உறுதி செய்யலாம்.
இயங்காத பூங்காக்கள் மற்றும் விளையாட்டு மைதானங்கள்
இளைய தலைமுறையின் ஆரோக்கிய வளர்ச்சிக்கு தேவையான இடங்கள் பூங்காக்கள், விளையாட்டு மைதானங்கள். அவை பராமரிப்பின்றி பற்றைகள், குப்பைகள் என சிதைந்து காணப்படுகின்றன. சின்ன சின்ன வேலைகளில் கூட பலன் அதிகம். கட்டமைப்புக்களை பழுது பார்த்து, மக்களை அந்த இடங்களைப் பயன்படுத்த தூண்டும் முயற்சிகள் தேவை.
செயல் மூலமாக நம்பிக்கை உருவாக்குங்கள்
இத்தகைய நடவடிக்கைகள், வெறும் அடிப்படை வேலைகளாக தோன்றினாலும், மக்கள் வாழ்க்கையில் மிகப் பெரிய மாற்றத்தை ஏற்படுத்தக்கூடியவை. மக்கள் உள்ளூராட்சி சபைகளிடம் எதிர்பார்ப்பது பெரிதல்ல. சுத்தம், ஒழுங்கு, சுகாதாரம், பாதுகாப்பு — இவை தான் அவர்களின் முதன்மையான கோரிக்கைகள்.
இவற்றை செய்தால் மக்கள் நம்பிக்கையை பெற்றுக்கொள்ள முடியும். சுற்றுலாப் பயணிகளும் அந்தந்த பிரதேசங்களை நோக்கி வரத் தூண்டப்படுவர். அதே சமயம், நகரங்கள், கிராமங்கள் அழகுபடுத்தப்படுவதால், அதன் பொருளாதார வளரும்.
வீணாக வார்த்தைகள் பேசிச் சண்டையிடும் அரசியல் காலம் கடந்துவிட்டது. இன்று மக்கள் பார்க்கும் அரசியல்வாதி, செயலில் தெரிவதைக் கொண்டே மதிக்கப்படுகிறார். இவ்வாறு பிரதேசத்தை அழகாக சுத்தமாக சுகாதாரமாக வைத்திருக்கும் வழிகளை இவர்கள் ஒழுங்காக கையாண்டால் இவர்கள் மீதும் இவர்கள் சார்ந்த கட்சி மீதும் நம்பிக்கை வரும். ஒரு ஒழுங்கான திட்டமிடலுடன், மக்கள் வாழ்க்கையை நேரடியாக தொடும் பணிகளை முன்னெடுப்பதில் கவனம் செலுத்துங்கள்.
அடுத்தவரை வீழ்த்துவதில் கவனம் செலுத்தாமல் விஞ்சுவதில் கவனம் செலுத்துங்கள்
