புதிர்- 13
ஒரு மந்திரவாதி கேட்டுக் கொண்டதற்கிணங்க காட்டிலிருந்த உடலை விக்ரமாதித்தன் சுமந்து சென்றுகொண்டிருக்கும் போது, அந்த உடலுக்குள் இருந்த வேதாளம் வழமை போலவே விக்ரமாதித்தனிடம் ஒரு கதை சொல்ல ஆரம்பித்தது.
ஒரு சமயம் விஜயபுரி என்ற நாட்டில் குருபசேனன் என்ற இளைஞன் வாழ்ந்து வந்தான். அவனுக்கு பிறவியிலேயே அவனது கால்களில் சற்று குறைபாடு இருந்ததால் மற்றவர்களைப் போல் அவனால் இயங்க முடியாமல் இருந்தது. மேலும் குருபசேனனின் தாய் அவன் சிறுவனாக இருந்த போதே இறந்துவிட்டதால், அவனது தந்தை இரண்டாவது திருமணம் செய்துகொண்டார். அப்படி குருபசேனனுக்கு சித்தியாக வாய்த்த அவன் தந்தையின் இரண்டாவது மனைவி, குருபசேனனின் உடல் குறைபாட்டை அடிக்கடி சுட்டிக்காட்டி அவனை இடித்துரைத்து வந்தாள். இதனால் வாழ்க்கையில் ஒரு விரக்தியான நிலையில் இருந்து வந்தான் குருபசேனன்.
அதேசமயம் அந்த நாட்டின் இளவரசியான “இந்துமதிக்கு” அவளின் தந்தையான அந்த நாட்டின் அரசன் திருமணம் செய்ய பல இளவரசர்கள் கலந்து கொள்ளும் ஒரு சுயம்வரத்தை ஏற்பாடு செய்தான். அப்போது இந்துமதி தாம் ஏற்பாடு செய்யும் போட்டியில் கலந்து தனது வீரத்தையும் புத்திக் கூர்மையையும் நிரூபிக்கும் நபரை மட்டுமே தாம் திருமணம் செய்யப்போவதாக திட்டவட்டமாக கூறிவிட்டாள்.
அவள் கூறியபடியே ஒரு உயரமான நடைமேடையில் இருபுறமும் கூர்மையான கத்திகளுக்கு மத்தியில் சிறு கீறல் கூட படாமல் கடந்து சென்று சற்று தூரத்திலிருக்கும் மணல்திட்டின் மீது குதிக்கும் நபரை இளவரசி இந்துமதி திருமணம் செய்துகொள்வார் என்று மன்னர் அறிவித்தார்.
இதைக் கேட்டு பல இளவரசர்கள் அங்கு கூடினாலும் யாரும் அந்த போட்டியில் கலந்து கொள்ளவில்லை. அப்போது அங்கு வந்திருந்த குருபசேனன், தான் இப்போட்டியில் கலந்து கொள்ள மன்னனிடம் அனுமதி கேட்டான். அவனது உடலின் குறைபாட்டை கண்டு முதலில் தயங்கினாலும் பிறகு அனுமதியளித்தார் மன்னர்.அதே நேரத்தில் இந்த போட்டியில் ஒருவேளை குருபசேனன் வெற்றி பெற்றால் அவனுக்கு தனது மகளை திருமணம் செய்ய வேண்டி வருமே என கவலையும் கொண்டார் மன்னர்.
அப்போது போட்டியில் கலந்துகொண்ட குருபசேனன், இளவரசியின் எதிர்பார்ப்புக்கேற்ற வகையில் வெற்றி பெற்றான். அடுத்ததாக அறிவாற்றலை ஆராய ஒரு புதிர் போடப்பட்டது.
டச்சு மற்றும் ஸ்பைக் என்னும் இரண்டு வீரர்கள் சம எண்ணிக்கையான மாபிள்களை வைத்து விளையாட்டொன்றை ஆரம்பித்தார்கள். முதல் சுற்றுக்குப் பிறகு டச்சு ஆரம்பத்தில் இருந்ததை விட 20 மாபிள்கள் அதிகமாக வைத்திருந்தார். ஆனால் இரண்டாவது மற்றும் இறுதி சுற்றில் அவர் தன்னிடம் இருந்த 2/3 மாபிள்களை இழந்தார். ஸ்பைக் ஆரம்பத்தில் இருந்ததை விட 4 மடங்கு அதிக மாபிள்களை வைத்திருந்தார். எத்தனை மாபிள்களுடன் இருவரும் விளையாட்டை ஆரம்பித்தார்கள் மற்றும் விளையாட்டு முடிந்ததும் இருவரிடமும் எத்தனை மாபிள்கள் இருந்தன என்பதை கண்டுபிடிக்க வேண்டும்.
குருபசேனன் சிறிது நேரத்திலே சரியான பதிலுரைத்தான். இதனால் இளவரசி இந்துமதியும் குருபசேனனை மணந்து கொள்ள சம்மதம் தெரிவித்தாள். ஆனால் குருபசேனன் அவளை திருமணம் செய்து கொள்ள மறுத்து விட்டான். அரசர் மிக்க கோவம் கொண்டு காரணத்தை வினவினார். அதற்கு அவன் தான் பல காலமாக தனது அங்க ஊனத்தை குறித்து தனது சித்தி குறை கூறியதால் வாழ்வில் மிகவும் நொந்து போயிருந்ததாகவும் இப்போட்டியை பற்றிக் கேள்விப்பட்டவுடன் அதில் கலந்து கொண்டு தன்னை போன்ற ஒருவனாலும் எதையாவது சாதிக்க முடியும் என்று உலகிற்கு நிரூபிக்க, இப்போட்டியில் தனது உயிரைப்பற்றி கவலைப்படாமல் கலந்து கொண்டதாகவும் இதில் வெற்றி அல்லது தோல்வி பெறுவதைப் பற்றி அவன் சிறிதும் அக்கறை கொள்ளவில்லை என்றும் அதே நேரத்தில் போட்டியில் வென்று இளவரசியே அவனை மணக்க சம்மதம் கூறியும் ஒரு நாட்டிற்கு ஆபத்து நேரும் காலத்தில் அதை எதிர்த்து சமாளிக்கக்கூடிய உடல்தகுதி தனக்கு இல்லை என்ற நியாயமான காரணத்தை கூறினான். அதைக் கேட்ட மன்னர் அவனை பாராட்டி அனுப்பினார்.
விக்ரமாதித்தனே இது உம்முடைய நேரம் குருபசேனன் கேட்கப்பட்ட புதிருக்கு என்ன பதில் அளித்திருப்பான் என கண்டுபிடியுங்கள் பார்க்கலாம் என கூறி அமைதி கொண்டது வேதாளம். மன்னரும் யோசிக்கத் தொடங்கினார். துமி அன்பர்களே நீங்களும் சிந்தியுங்கள் பதிலை எமது மின்னிதழிற்கு அனுப்பி வையுங்கள்.
