ஆரம்பக் கிரிக்கெட் (1799ற்கு முந்தைய காலம்)
சாஸன்கள் அல்லது நார்மன்கள் காலத்தில், தென்கிழக்கு இங்கிலாந்தில் அடர்ந்த காடுகள் மற்றும் வெளியிடங்களைக் கொண்ட வீல்ட் (Weald) பகுதியில் வசித்த குழந்தைகளால் கிரிக்கெட் உருவாக்கப்பட்டிருக்கலாம் என நிபுணர்கள் பலர் ஏற்றுக் கொள்கின்றனர். 1611ஆம் ஆண்டு முதன்முறையாக பெரியவர்கள் கிரிக்கெட் விளையாடியதாக குறிப்பிடப்பட்டுள்ளது. அதே ஆண்டு, ஒரு அகராதியில் கிரிக்கெட்டைப் “பையன்களின் விளையாட்டு” எனவும் வரையறுக்கப்பட்டுள்ளது. கிரிக்கெட், “பவுல்ஸ்” எனும் விளையாட்டிலிருந்து தோன்றியிருக்கலாம் என்றும், அந்த விளையாட்டில் பந்தை அடிக்காமல் தடுக்க ஒரு பேட்ஸ்மேன் முயற்சித்ததன் மூலம் கிரிக்கெட் உருவானதாகவும் கருதப்படுகிறது.
17ஆம் நூற்றாண்டின் நடுப்பகுதிக்குள் கிராம கிரிக்கெட் உருவெடுத்து, நூற்றாண்டின் இரண்டாம் பாதியில், கிராம கிரிக்கெட்டில் திறமைசாலிகளை நியமித்து முதல் தொழில்முறை வீரர்கள் தோன்றினர். முதன் முதலில் கவுண்டி (county) என அழைக்கப்படும் அணிகள் மோதிய விளையாட்டு 1709ல் நடைபெற்றது.
ஆரம்ப கிராம கிரிக்கெட்
18ஆம் நூற்றாண்டின் முதல் பாதியில், கிரிக்கெட் லண்டன் மற்றும் தென்கிழக்குப் பிரதேசங்களில் ஒரு முன்னணி விளையாட்டாக உயர்ந்தது. பயணக் கட்டுப்பாடுகள் காரணமாக அதன் பரவல் குறைவாக இருந்தாலும், இங்கிலாந்தின் பிற பகுதிகளிலும் அது மெதுவாக பிரபலமாகி வந்தது. பெண்கள் கிரிக்கெட்டும் 1745ஆம் ஆண்டில் சற்ரி (Surrey) பகுதியில் நடைபெற்ற முதல் போட்டியுடன் தொடங்கியது.
1744ஆம் ஆண்டு, கிரிக்கெட்டின் முதல் சட்டங்கள் எழுதப்பட்டன. பின்னர் 1774இல் அவை திருத்தப்பட்டன. இதில் “எல்.பி.டபிள்யூ” (lbw), மூன்றாவது கட்டை (middle stump) மற்றும் பேட் அகலம் குறித்த வரையறைகள் சேர்க்கப்பட்டன. இச்சட்டங்கள் “ஸ்டார் அண்ட் கார்டர் கிளப்” உறுப்பினர்களால் தயாரிக்கப்பட்டன; இவர்களே 1787இல் புகழ்பெற்ற “மேரிலிபோன் கிரிக்கெட் கிளப்” (Marylebone Cricket Club – MCC) ஐ உருவாக்கினார்கள். MCC உடனடியாக கிரிக்கெட் சட்டங்களின் பாதுகாவலராக ஆனது மற்றும் இன்று வரை அவற்றை திருத்திக் கொண்டே வருகிறது.
பந்து தரையில் உருட்டுவதற்குப் பதிலாக, 1760க்குப் பிறகு பந்தை துள்ளவிடும் முறையில் வீச தொடங்கினர். இதற்கான பதிலளிப்பாக, பழைய “ஹாக்கி ஸ்டிக்” பேட் முறைக்கு பதிலாக நேராக உள்ள பேட் அறிமுகம் செய்யப்பட்டது. ஹேம்பில்டன் கிளப் (Hambledon Club), ஹாம்ப்ஷயரில், MCC உருவாகும் வரை (1787) சுமார் 30 ஆண்டுகள் கிரிக்கெட்டின் மையமாக இருந்தது.
17ஆம் நூற்றாண்டில் இங்கிலாந்து காலனிகளின் வாயிலாக கிரிக்கெட் வட அமெரிக்காவுக்கு அறிமுகமானது. 18ஆம் நூற்றாண்டில் அது உலகின் பிற பகுதிகளுக்கும் பரவியது. மேற்கிந்திய தீவுகளுக்கு காலனியர்களால், இந்தியாவுக்கு இங்கிலாந்து ஈஸ்ட் இந்தியா கம்பெனியின் கடல் வீரர்களால் அறிமுகப்படுத்தப்பட்டது. 1788ஆம் ஆண்டில் ஆஸ்திரேலியாவில் குடியேற்றம் தொடங்கியதும் கிரிக்கெட்டும் அங்கு வந்தது. 19ஆம் நூற்றாண்டின் ஆரம்பத்தில், கிரிக்கெட் நியூசிலாந்து மற்றும் தென் ஆப்பிரிக்காவிலும் பரவியது. இவ்வாறான சுவாரஸ்யமான வரலாற்றை கொண்டதே கிரிக்கெட்.
